Mirtehof – ’n Lushof in die Groot Karoo

Die tuinontwerper het gesorg vir detail in elke hoekie van die tuin. Foto: Marlene Malan

Deur Marlene Malan
DIE nuwe eienaars van die gastelandgoed Mirtehof in Prins Albert, Stevan Möller en Bets Möller (néé Janse van Rensburg), se band met die dorp strek te­rug na die vroeë 1900’s toe Bets se ou­pa­groot­jie, Christiaan Bam, land­dros op Prins Albert was.

Dis een van die redes waar­om dié Bloemfonteinse egpaar altyd wou terugkeer na die Groot ­Karoo: Eers net om te kom kyk, en later om self eiendom te koop. En toe hulle eers hul eers­te huis in Mark­­straat, Prins Albert, aange­skaf het, het hulle ge­weet: Hul jarelange droom – om ’n gastehuis te begin – lê om die draai.

“Daar was vir ons geen beter plek as Prins Albert nie,” vertel Stevan. Kombineer dit met Bets se wens om “eendag” ’n eie plaas­tuin en vyebome te hê, en dit was nie vir hulle moeilik om die volgende tree te gee nie. Dit was om Mirtehof, ’n histo­rie­se plaas van 4,7 ha, te koop toe dit in die mark kom.

“Daar was twee geskikte eiendomme, maar ons het Mirtehof gekies omdat dit nog werk nodig gehad het – en ons wou graag ons eie stempel afdruk.”

Die gastehuis is in September 2018 geopen. Ry jy vandag deur die mooi hout­hekke van dié eiendom aan die Swart­bergkant van die dorp, begroet ’n lushof jou. Die statige ­hoofopstal is tot sy oorspronklike glorie ge­restoureer en die tuin om die huis illustreer presies die woord “paradys”.

Elke hoekie van die huis, elke bedding en paadjie in die tuin is tot in die fynste detail beplan. Dat die hoofwoning in ’n gastehuis om­skep is, is byna onopvallend – terwyl elk van die drie suites (The Prince Albert Suite, The Orchard en Arcadia) privaat is, met eie kuierareas, buite­deure en stoepe. Gaste wat hier tuis­gaan, kan egter ook ’n ge­meenskaplike sitkamer en twee ontbytstoepe gebruik.

Mirtehof het ook ’n selfsorg-gas­te­kothuis met twee eenhede wat apart of as ’n eenheid bespreek kan word. In die middel van die tuin, naas die swembad, is ’n ont­haalvertrek – of tuinhuisie – waar gaste kan uitspan.

Volgens die Möllers is die tuin beplan met die hulp van die tuinontwerper Rentia Verster en die bouers Adan Liepner en Neels Swart. Stevan, wat ’n loopbaan op landbougebied en in die eiendomsmark gebou het, het sý wens laat waar word – om ’n groentetuin deel van die hooftuin te maak. Die eindresultaat staan nie ’n tree terug vir die beddings roosbome en ander plante nie.

Dit was vir die egpaar belangrik om plaaslike arbeid te betrek. Die vier tuinwer­kers en drie werkers in die hoofwoning is almal Prins Alberters. Net die gaste­huis­bestuur­der, Hester Nel, ’n Vrystater uit Ficksburg se wêreld, is “ingevoer”.

’n Aantreklikheid vir stads­moeë besoe­kers is die rustigheid en plaas­at­mos­feer met sewe donkies, twee ponies, twee skape­, ses henne en een haan in kampe op die verste punt daarvan.

Volgens Stevan en Bets het Mirtehof in die 1890’s aan ene De Vries behoort. Sy dog­ter, Helena, was glo verlief op die skry­wer CJ Langen­ho­ven van Oudts­hoorn. Die pa het sy dogter egter ge­dwing om hul verlo­wing te verbreek weens die “onsekerheid” oor Lan­­genho­ven se le­we en loopbaan.

Stevan en Bets pen­del tans nog tus­sen Bloemfontein – waar Bets ’n pato­loog is – en Prins Albert, maar die dag kom nader wat hulle hul permanent in die Karoo gaan vestig. “Ons kan skaars wag!” sê Stevan.

Log in with your credentials

Forgot your details?