Van hier tot Orlando vir Quintus

Deur Ilze-Mari Gründling
’N GRAAD 10-leerder van die Hoër­skool Oudtshoorn is gekies om in Desember na Orlando, Florida te toer as deel van die Actors, Models & Talent for Christ (AMTC)-SHINE-toergroep.

Quintus Viljoen (16) het vroeër die maand aan die South African Talent (SATCH)-kompetisie in Pretoria deel­geneem en drie goue medaljes en een silwer medalje vir sy toneelspel verwerf. Hy het ook ’n algehele tweede plek in die drama-afdeling verwerf.

SATCH wil geleenthede vir ta­lentvolle Suid-Afrikaners skep om deur kundiges in die vermaaklik­heidsbedryf ontdek te word.

Quintus sê hy is van sy laerskooldae af lief vir toneelspeel. “Ek het op laerskool drama geneem en baie daarvan gehou. Met die hoërskool se ope aand het ek gesien dat hulle drama aanbied. Ek het baie van die drama-aande bygewoon en neem nou gereeld deel.”

Quintus se ma, Loderia, vertel dat hy van kleintyd af sy lyf akteur gehou het. “Hy het gereeld an­der klere aangetrek en gemaak of hy iemand an­ders is. Hy het ons gereeld vermaak. Met sy pres­tasie by SATCH het hy ons almal en homself verbaas!”

Sy sê Quintus is ’n onafhanklike, gedissipli­neerde, verantwoordelike en self-gemotiveerde kind met ’n Goddelike talent wat hy graag tot eer van sy Skepper wil aanwend.

Hy is vir twee jaar by sy skool se dramagroep as beste manlike akteur in ’n verhoogstuk aan­ge­wys en die jongste deelnemer nog wat tot die finale ronde van kykNET se toneelkompetisie in Kaapstad deurgedring het. Hy is ook ge­nooi om aan die prestige konsert van die George Eisteddfod deel te neem vanweë sy hoë punte vir prosa (A++).

Quintus sê hy wil graag na skool in flieks speel, en streef daarna om ’n goeie voorbeeld vir ander te wees.
• Enigiemand wat graag ’n finansiële bydrae wil maak om dit vir Quintus moontlik te maak om na

Orlando te reis, kan Jurie en Loderia Viljoen by 082 921 6721 kontak. Quintus benodig fondse om die re­gistrasie, vlugkaartjie en verblyf te dek. Die groep sal werkswinkels en seminare, aangebied deur kundiges van Hollywood, New York en ander groot stede van regoor die wêreld, asook repetisies en toneelstukke bywoon.