Verwoeste sypaadjies se toekoms

Kerkstraat op Oudtshoorn nadat dit onder die subkontrakteur deurgeloop het.

’n Sypaadjie nadat dit opgekap is vir die lê van optiese veselkabel.

Die hoek van Kerk- en Baron van Reedestraat gister nadat Cybersmart self ingespring het om met die herstel van sypaadjies op die dorp te begin. Foto’s verskaf

Liesel le Roux en Angelique Erasmus
DAAR is hoop vir Oudtshoorn se sypaadjies in veral die middedorp wat die afgelope maande permanent soos iets uit ’n oorlogsone lyk. Die sypaadjies is oor die afgelope maande op groot skaal deur subkontrakteurs van die firmas Cybersmart en Liquid-Telecom opgekap vir die lê van optiese veselkabel vir verskeie staatsinstel­lings. Die herstelwerk daarna was egter in sekere gevalle erg onvoldoende.

Veselkabel bestaan uit haardun pypies van glas of plastiek. Data word deur die pypies gestuur deur lig­seine. Veselkabel maak vinniger internet moontlik.

Volgens Ntobeko Mangqwengqwe, woord­voer­­der van die Oudtshoorn Munisipaliteit, het die firmas toestemming van die munisipaliteit gekry vir die lê van die veselkabel na die indie­ning van ’n projekplan.

’n Voorwaarde vir toe­stem­ming was dat die sypaadjies herstel moet word na hul oor­spronk­­like toestand.

Na verneem word is van die konstruksiewer­kers al verskeie kere deur die munisipaliteit opdrag gegee om werk oor te doen.

Liquid Telecom werk volgens Mangqwenqwe, in Adderleystraat van Oranjestraat na Voor­trek­kerweg; in Voortrekkerweg van Adderley- na Baron Van Reedestraat; in Langenhovenweg vanaf Voortrekkerweg tot Cowleystraat en tot by die munisipale kantore en Wes-Kaapse provinsi­ale kantore in Vredestraat; Baron van Ree­destraat van Voortrekkerweg na die Eljada Skool; St Johnstraat van Baron van Reedestraat tot Parkweg, Parkweg tot by die hospitaal. Veselkabel is onder meer aangelê na die Laerskool Van Reede, die Adderleystraat-kliniek, die Oudtshoorn Hospitaal die Oudts­hoorn Polisiekantoor, en ook na South Cape Wireless, ’n internetverskaffer in Kerkstraat, Oudtshoorn.

Liquid-Telekom beoog om herstelwerk van die sypaadjies en paaie eersdaags af te handel.

Cybersmart het op hul beurt ’n kontrakteur van Mosselbaai gekry om ook veselkabel in Kerkstraat tot by

South Cape Wireless aan te lê. Dié kontrakteur het egter sowat ’n week gelede “verdwyn” waarna Cybersmart ’n span vanaf Kaapstad na Oudtshoorn moes stuur om die sypaadjies te kom herstel.

Volgens Kyle Johnson van Cybersmart behoort die herstelwerk teen die einde van volgende week afgehandel te wees. Nuwe bakstene vir die plaveiwerk moes vanaf Mosselbaai bestel word nadat die vorige kontrakteur meer as 50% van die stene beskadig het.

Chris de Wit, eienaar van South Wireless, sê hy is nou is die enigste internetverskaffer in die Tuinroete wat soveel veselkabel as rugsteun het. Hy het ook veselkabel van Tel­kom en Openserve. De Wit sê ander besighede sal in die toekoms ook voor­deel hieruit kan trek omdat die infrastruktuur nou gevestig is.

Log in with your credentials

Forgot your details?