Rivier by hangbrug ‘herdoop’ oor stank

Dié “naamborde” wat kommentaar lewer op die stank in die rivierwater by die hangbrug op Oudts­hoorn is Maandag-oggend daar geplaas, maar is later die oggend verwyder. (Foto’s verskaf.)

Deur Liesel le Roux
“VROTWATER FONTEIN.” En “STINK FONTEIN.”
So lui twee “naamborde” wat Maandagoggend deur anonieme inwoners van Oudtshoorn by die historiese hangbrug op Oudtshoorn neergesit is.

Foto’s van die “naamborde” by die hangbrug is ook die oggend aan Die Hoorn gestuur.

Inwoners kla al etlike jare oor ’n erge rioolstank wat dikwels by die hangbrug opvallend is. Die brug, wat onlangs deur die munisipaliteit geres­tou­reer is, is ’n nasionale erfenisgebied met talle gastehuise in die omgewing.

Die Tuinroete Distriksmunisipa­li­teit (voorheen Eden Distriksmunisipaliteit) het in Mei vanjaar aan Die Hoorn bevestig die reuk word ver­oor­saak deur rioolwater wat as ge­volg van onder meer rioolverstoppings in die omgewing van die

Infanterieskool via ’n storm­waterpyp in die Grobbelaarsrivier loop.

Ondanks jarelange klagtes van inwoners oor dié stank en die gesondheidsprobleem wat dit skep, is die verantwoordelike owerhede klaar­blyklik nie daartoe in staat om dit op te los nie.

Herman Pieters, senior kommuni­kasiebeampte van die distriksmunisipaliteit, het in Mei aan Die Hoorn gesê dat die SANW-gebied deur ’n stormwaterstelsel gedreineer word, maar dat verstoppings veroorsaak deur riool, waswater en afvoerstelsels daar tot gevolg het dat rioolstelsels oorloop en vuil water in die stormwaterstelsel en so in die Grobbelaarsri­vier in Kerkstraat beland. Volgens Pieters is die Infanterieskool en die assistent-direkteur van omgewingsgesondheid (Area Militêre Gesondheidseenheid, Wes-Kaap) be­wus van die probleem.

Intussen wag inwoners van die om­gewing en besoekers aan die hangbrug op ’n oplossing vir hierdie klad op die naam van Oudtshoorn.

So skryf Annelize Kruger Schutte op Facebook oor die boodskap van die naamborde van Maandag: “Stem 100% saam! Ons wat daar naby woon, beleef dit elke dag. Dit skep so ’n swak indruk… veral in KKNK-tye, wanneer toeriste daar stap.”

Die Distriksmunisipaliteit en die Oudts­hoorn Munisipaliteit het teen druktyd gister nog nie een op navrae van Die Hoorn oor die borde en die stank by die brug gereageer nie.

Log in with your credentials

Forgot your details?