Nuwe woonbuurtsentrum vir dorp

’n Argiteksvoorstelling van die woonbuurtsentrum wat op die terrein van Klein Karoo Beperk op Oudtshoorn gebou gaan word.

Deur Liesel le Roux
’N NUWE woonbuurt-winkel­sentrum sal na verwagting sy deure in die tweede helfte van 2020 op Oudts­hoorn open. Dié Klein Karoo Woonbuurtsentrum gaan op die grond van die Klein Karoo Beperk in Parkweg, Wesbank gebou word.

Die winkel- en vertoonruimte van die sentrum sal sowat 5 500 vierkante meter beslaan. ’n Verkeersirkel gaan in Parkweg gebou word om veilige toegang tot die sentrum te bied en terselfdertyd verkeersvloei in die straat te kalmeer, terwyl ’n landskapsargitek ingespan sal word om ’n nuwe groen strook langs

Parkweg te vestig wat die sentrum en Agri Klein Karoo, die huidige handelstak, visueel sal integreer.

Daar word ook voorsiening gemaak vir voldoende parkeerplek.

Johan Schoeman, uitvoerende hoof van Klein Karoo Beperk, sê daar word tans gesprek gevoer met belangstellende huurders oor die beskikbare ruimte.

“Hoewel die oor­hoofse beplanning afgehandel is, kan ’n per­seel in hier­die stadium steeds doel­gemaak ingerig word vir ’n huur­der se spesifieke behoeftes,” sê hy.

Volgens Schoeman is dit vir Klein Karoo belangrik om ’n super­mark in die sentrum te hê waar ’n inwoner sy of haar hele maand se inkopies sal kan doen, asook om die regte ver­skei­denheid winkels daar in te bring.

“Ons wil graag die ruimte wat ons beskikbaar het, reg aanwend – tot voordeel van Klein Karoo en die huur­der en die publiek,” sê hy.

Volgens Schoeman behoort bou­werk binne die volgende ses maande af te skop.

• Planne met die vestiging van ’n winkelsentrum in Bridgton, Oudts­hoorn gaan intussen ook voort, hoe­wel geen bouwerk nog op die terrein in Springbokweg plaasgevind het nie.

Die Bridgton Mall is in Augustus verlede jaar tydens ’n sooispit-byeen­koms bekendge­stel met ’n moontlike openingsdatum Paasfees vanjaar.

Volgens Boet Smuts, ont­wikkelaar van Stellenbosch, was vordering met die sentrum egter nie so vinnig soos aanvanklik gehoop is nie, maar is die projek beslis nog aan die gang.

Log in with your credentials

Forgot your details?