Geliefde inwoner en sportman sterf

Abrie de Vries saam met Sune Rupping, voormalige president van die Oudtshoorn Rotariërs, toe hy in 2017 deur die organisasie vereer is vir sy bydrae tot gholf.
Foto: Higgo Jacobs

Deur Higgo Jacobs
EEN van Oudtshoorn se bekendste inwoners en sportmanne, oom Abrie de Vries, is Sondagnag in sy slaap in die geseënde ouderdom van 93 jaar oorlede.

Sy vrou, Elma is verlede jaar oorlede.

De Vries se prestasies op die gholfbaan is legen­daries.

Hy het tot op die ouderdom van 90 jaar sy ouder­dom op die gholfbaan geklop deur ’n bruto-telling van minder as 90 houe aan te teken.

Sy voorgee het 40 jaar lank gewissel tussen 2 en 6. Min gholfspelers ter wêreld val in hierdie klas. Hy is dan ook heel tereg in 2017 deur die Oudts­hoorn Rotariërs vereer vir sy prestasies op die gholfbaan.

De Vries was vir baie jare ’n boer in die Willowmore-distrik. Daarna het hy en sy vrou, Elma, na Oudtshoorn verhuis waar hulle van die eerste inwoners van die Oudtshoorn Aftreooord was.

De Vries was ook die stigter van die Kannie­dode, ’n groep senior gholf­­­spelers van Oudtshoorn wat elke Maandagoggend aantree vir ’n ronde gholf. Op Maandag­aand, 5 Desember 2016, tydens die Kanniedode se jaareindgeselligheid by die Oudts­hoorn Gholfklub, het hy aange­kon­dig dat hy sy gholfstokke ná 62 jaar gaan neerlê.

“Vandag was my laaste ronde,” het ’n bewoë De Vries gesê.

De Vries was nie net ’n goeie gholfspeler nie, maar ook ’n gewilde vriend en mens wat oral res­pek afgedwing het.

Hy word oorleef deur drie kinders, Cecile Loubser van Oudtshoorn, Garetha Strydom en Anler de Vries, nege kleinkinders asook agt agterklein­kinders.

Sy begrafnisdiens vind Woens­dag, 14 Augustus, om 14:30 in die NG Ge­meente Park op Oudts­hoorn plaas.