Dorp kort beleggings om te kan oorleef

Heelbo is ’n foto van Hoogstraat baie lank gelede. Soos die onlangse foto bo is dit duidelik dat Hoogstraat oor die jare baie bedrywig was. Albei foto’s is suidwaarts geneem.

Deur Liesel le Roux
ONTWIKKELING en belegging op Oudtshoorn is noodsaaklik sodat die dorp ekonomies kan groei en die belas­tingbetalende inwoners wat die dorp se finansiële laste dra, kan vermeerder.

So het die voorsitter van die Oudtshoorn Besigheidskamer, Gideon Badenhorst, Dinsdagaand by ’n maandelikse netwerkaand gesê.

Badenhorst het by die vergadering ’n uitnodi­g­ing aan die Oudtshoorn Munisipaliteit gerig om saam met die Besigheidskamer te werk aan inisia­tiewe om die dorp se ekonomie te laat groei. “Ons wil graag weet wat die Besigheidskamer kan doen om saam met die munisipaliteit beleggings na Oudtshoorn te trek,” het hy gesê.

Badenhorst het gesê dat dit ter wille van die toe­koms van Oudts­hoorn noodsaaklik is dat die spreekwoordeli­ke gans wat die goue eiers lê, “groter gemaak moet word.”

Die hoof finansiële beampte van die Groter Oudtshoorn Munisipa­li­teit, Felix Lötter, het tydens ’n voorlegging die aand aan die Besigheidskamerlede daarop gewys dat daar geen groei is in die dorp se belastingbasis nie, en dat die gevaar bestaan dat verhogings in tariewe die “gans wat die goue eiers lê” se nek kan omdraai.

Volgens Lötter het Oudtshoorn en Mosselbaai baie dieselfde inwonertal, maar is Oudtshoorn se belastingbasis R10,3 miljard sterk teenoor Mosselbaai se belastingbasis van R30 miljard. Dit is volgens hom een van die redes waarom Mosselbaai laer tariewe kan hef.

Lötter het ook daarop gewys dat die verskaffing van RDP-huise aan inwoners ’n verdere finansiële las op die munisipaliteit plaas.

“Nuwe RDP-huise bied byvoorbeeld geen in­komste vir die munisipaliteit nie. Elke persoon wat nie vir munisipale dienste kan betaal nie, plaas ’n finansiële las op die munisipaliteit. Elke 700 nuwe RDP-huise is verantwoordelik vir ’n styging van 5% in die las op die belastingbasis.”

• Volgens Badenhorst het die Besigheidskamer die ekonomiese groei van Oudtshoorn as ’n priori­teit geïdentifiseer en hou die kamer Vrydagoggend ’n strategiese beplanningsessie hieroor.
• Meer oor Lötter se terugvoer op bladsy 2.

0 Comments

Leave a reply

Your email address will not be published. Required fields are marked *

*

©2017. Digitale projekbestuur deur Lumico.

Log in with your credentials

Forgot your details?