Wie se hart klop onder die enjinkap?

Deur Arno Greyling

Deur Arno Greyling

DIE motorwêreld is maar ’n snaakse plek. Produkte is tot ’n groot mate die­self­de, en tog ook nie. Dié een het bietjie meer krag, dáárdie een is slim genoeg om jou te waarsku wanneer “jou oë te veel knip” wat ’n aanduiding is dat die moeg­heid besig is om jou as bestuurder in te haal.

Van hul parkeer hulself en ons kan reeds uitsien na motors in die nabye toe­koms wat sonder enige menslike insette jou van punt A na punt B gaan neem. Terloops, daar word gereken dat die ko­men­de geslag Amerikaners nie meer rybewyse sal hê nie. Bestuurderlose mo­tors sal as vervoer dien. Ons weet reeds dat dinge in Afrika bietjie stadiger vor­der, maar kom sal ons ook daar kom.

Die punt waarby ek wil kom, is dat ont­wikke­ling nou sneller as ooit plaas­vind. Vervaardigers is angstig om by te hou, want anders gaan van hulle nie oorleef nie. En daarin lê die antwoord vir die baie oornames tans van een vervaardiger deur ’n ander.

Die mees onlangse gevalle is Peugeot wat Ci­troën gekoop het en net daarna is aangekondig dat die nuutgevormde groep ook vir Opel by die Duitsers gaan koop. Die Renault-Nissan-groep (ek weet nie hoeveel lesers weet dat dit eintlik Renault is wat Nissan uitgekoop het nie?) het Mitsubishi nou onlangs bekom en Tata is die trotse eienaars van die Jaguar-handelsmerk.

Sien, dit is baie goedkoper om oorna­mes te doen en sodoende tegnologie te “koop”, as om dit self te doen. En na­tuurlik spaar dit baie tyd; en tyd is geld.

Groot was die verbasing onlangs toe Mercedes aankondig dat dié reus nou die bakkiemark gaan betree. Die ope geheim is dat die bakkie eintlik grotendeels ’n Nissan Navara in hart en ruggraat is – moontlik gemaak deur ’n ooreenkoms tus­sen die twee groepe – en siedaar, Mercedes kan sy bekende driester opsit en verder sakke vol geld maak met sy “Mercedes’’-bakkie!

En natuurlik speel die ekonomie van skaal ook ’n reuse rol met die oornames. Hoe meer die tegnologie benut kan word (dus hoe meer van die produk vervaardig in die mark kan kom), hoe goedkoper per eenheid is die vervaardigings­koste. Ek lees juis verlede week in Die Burger dat BMW al reeds meer as 10 jaar die vervaardiger is van al Peugeot se 1.6 enjins! Ek wed jou dat daar sommer nog baie lesers van Die Hoorn is wat gereken het dat Peugeot onbetroubaar en tipies Frans­man ook temperamenteel van ge­aardheid is, maar hoeka is dit die Duitsers wat die grootste gros Peugeots op die pad woema gee.

En nou is Opel ook in die Peugeot-Ci­troënstal. General Motors kon nooit eintlik die fantastiese handelsmerk tot sy reg laat kom nie. Persoonlik het ek ’n baie sagte plekkie vir Opel. In die vroeë sewentigs het ek al te heerlik as pienk­voet saam met Oupa Danie deur die stra­te van Britstown gerits in sy Opel Ka­dett. Goeie herinneringe van ’n puik motor wat vanjaar in sy moderne gewaad (die Opel Astra) as Motor van die Jaar in Suid- Afrika en as die Europese Motor van die Jaar (2016) aangewys is. Ek hoop van harte dat met hernude posi­sië­ring en bemarkingsfokus ook hier­die han­delsmerk sy regmatige plek sal inneem tussen die grotes in die bisarre wêreld van motorhandel.
Groetnis tot ’n volgende keer …

0 Comments

Leave a reply

Your email address will not be published. Required fields are marked *

*

©2017. Digitale projekbestuur deur Lumico.

Log in with your credentials

Forgot your details?