15 hospitaal toe ná taxi rol

Die toneel verlede Vrydag (bo) kort na die botsing. Regs sien noodpersoneel om na van die beseerdes. Foto’s: Schalk le Roux

Die toneel verlede Vrydag (bo) kort na die botsing. Regs sien noodpersoneel om na van die beseerdes. Foto’s: Schalk le Roux

1 BotsBeseerdes

Deur Liesel le Roux
VYFTIEN persone is verlede Vrydag in die Oudts­hoorn Hospitaal se noodeenheid behandel na­dat ’n Toyota Quantum-minibus-taxi in Jones­straat om­geslaan het na ’n botsing met ’n blou Hyundai. Die taxi het op sy dak teen ’n muur tot stilstand gekom.

Die taxi se 18 passasiers en be­stuurder, Robert Davids, was aanvanklik in die omgekeerde taxi vasgekeer, terwyl mense van buite gesukkel het om die agterdeur oop te kry.

Davids is na die hospitaal geneem met nek- en rugbeserings. Verskeie van die ander beseerdes het ook nek- en rugbeserings opgedoen.

Volgens Nadia Ferreira, woord­voerder van die Wes-Kaapse Departement Gesondheid, is die meeste insittendes van die taxi vir sagteweefselbeserings behandel en die aand reeds ontslaan.

“Ses van die pasiënte is in die hospitaal opgeneem met twee wat na die George Hospitaal oorgeplaas is vir verdere behandeling.”

Volgens David Maksella, bestuurder van die Hyundai, wou hy regs draai toe die taxi sy kar getref het. Die botsing het omstreeks 13:14 plaasgevind.

’n Video van die ongeluk wat op die Facebook-blad Oudtshoorniete staan saam gedeel is, toon hoe die Hyundai na regs begin beweeg om regs in Plein­straat in te draai, terwyl die taxi ook na regs beweeg om by die Hyundai verby te gaan. Die taxi tref dan die Hyundai regs voor op sy neuskant waarna die taxi omslaan en op sy dak oor die pad tot teen ’n muur skuif.

Remmerke op die pad het sowat 50 meter ver gestrek. Kapt Gretchen Michaels, woordvoerder van die Oudtshoorn Polisie, sê ’n klagte van roekelose en nalatige bestuur word ondersoek.

0 Comments

Leave a reply

Your email address will not be published. Required fields are marked *

*

©2018. Digitale projekbestuur deur Lumico.

Log in with your credentials

Forgot your details?